صو صو صو صو ...........أصوات عصافير
-صباح الخير يا ماما
-صباح الخير يا ضنايا اتأخرت فى النوم انهاردة يعنى؟
-اسكتى يا ماما أما أنا حلمت حتة حلم امبارح
- خير يا حبيبى
- حلمت قال ايه ان الحوافز اللى متأخرة أديلها أكتر من 3 شهور جت الخزنة وقبضنا
- يلهوى وبعدين ؟
- وقال ايه المدير بيسلم عليا وباسنى من هنا ومن هنا وقالى اوعه يكون حد مزعلك ولا داسلك على طرف فى الصحة
- يا ساتر يا رب باسك؟!!!!!لأ لأ يابنى أنا لازم ابخرك بالمستكة والفستكة وعين العفريت
- وليه تبخرينى يا ماما؟!!!
- هو مش باسك يبقى هيسمم عيشتك بوسة المدير أنا عارفاها
- ياه ... امال لو قلتلك على باقى الحلم هتعملى ايه؟
- قول يا كبدى
- المدير خدنى عنده المكتب وجاب موظفين الحسابات والشئون القانونية وقالهم الدكتور ده سيدكم وتاج راسكم و...........
- بس يابنى متكملش الموضوع ده عايز زيارة للشيخ أبو سماعة قبل متقولى ان الوزير رضى يقابلك وقعدت معاه
